百萬Blogger：買樓第一口價 必試業主底綫

記得當年初初步入物業市場，人人行入地產舖找Agent，都話想買筍盤，Agent有盤都唔知Call邊個客好。

要買筍嘢，自我定位好重要，要別人記得你係乜水、想要乜，否則有好貨都唔識通知你，所以一定要突圍，令別人記得自己。

我當年只是主力搵某一座大廈，每日行過，都問代理該座大廈有無盤，搞到他們發開口夢都記得我想搵該座大廈，只要收到該座大廈的盤，便立即記起我。

先建立個人品牌

這一招在我當年做行街時，已經運用得爐火純青，每當認識一個新客戶，我最初一定會成日去探班，去到連Reception都認得我，得閒又買吓蛋榚過去，基本上一頭半個月後，不用再去，通電話都可以了。

這招在天光墟亦可應用。為了令檔主有寶物時想起我，首先我會挑選一些不算多人買的貨，就是舊皮篋，而且第一日落去就先買一個，拿着四圍行，非常矚目，吸引好多檔主會主動問我；何解買個如此殘舊的篋。

我就趁機話佢知，我喜歡儲舊物，特別鍾意篋，亦會明確話佢知，我只會買某價錢以下的篋，那麼以後他們有篋都會通知我，而且基本上叫得我買的，都不用怎講價。

我就是如此，日日去，去足一個月。雖然近排少去了天光墟，但相信他們仍記得邊個係「篋神」。不止在天光墟，買樓、打工，甚至讀書都係，如果你在一個市場發展，無人識你就一定唔會成功！

還價試業主底綫

講開天光墟，內裏蘊藏許多尋寶大智慧，大可運用在投資物業市場。

例如講價，許多朋友都話買樓唔識還價，我奇怪點解唔識，想還幾多咪還幾多囉！點知原來個個話驚俾人鬧喎！你又唔係「大Wet刁」（Direct deal），怕甚麼？要鬧都係鬧個Agent。驚Agent唔肯還價？你唔使俾佣咩？如果業主開價幾多，你就俾幾多，Agent要來做咩呢？

不過，在天光墟我基本上講價不多，因為好多擺檔的都是老人家，搵餐茶而已，俾多少少當請他們飲茶；但如果在「鴨記」（鴨寮街）對住生意人，就一定會講價。

還價有無技巧？基本上無，總之如果檔主開100元，你想80元買，梗係不會咁單純還80元啦，否則佢一定回你一口90元，咁你又要還多口價。

但如果，佢80元即刻賣俾你，你重驚，因為佢心目中的底價可能係70元甚至60元，你一還80元即「瀨嘢」。所以講價時，通常第一口就還價一半。

不過如果對方接受，其實你又會驚，因為可能中咗「還價即死」，即係開個天價任你還，基本上你還咩價都會賣，正所謂「唔怕你癡，唔怕你呆，最怕你唔來」，只要你肯還價佢一定賣。

你估物業市場又有無這樣情況出現呢？有無業主用過呢招呢？所以記住，要試業主底價，第一口價一定要還得低過業主底價，你先有機會知到底價是多少。

標題經TOPick 修改，原題為〈樓市尋寶智慧〉

全文刊於《iMoney智富雜誌》第406期（收費閲讀）

iMoney智富雜誌facebook